ԵՐԵՎԱՆ, 14 հոկտեմբերի. /ԱՌԿԱ/. Նախօրեին Կոտայքի մարզի Առինջ գյուղում կնոջ ներկայությամբ սպանել են «Ինեկոբանկի» գլխավոր գանձապահ, 55-ամյա Լևոն Ավետիսյանին, հայտնում է pastinfo.am գործակալությունը։
Հաղորդագրության համաձայն, Ավետիսյան ամուսինները ենթարկվել են հարձակման իրենց BMW մակնիշի ավտոմեքենայով տուն վերդառնալիս։
«Անհայտ անձինք դիմահար արձակված կրակոցով սպանել 55-ամյա Լևոն Ավետիսյանին, նրա կինը վնասվածքներով տեղափոխվել է հիվանդանոց… Հարձակում կատարողները եղել են երկուսով. մեկը դիմակով, մյուսը՝ գլխարկով»,– նշվում է հաղորդագրության մեջ։
Ինչպես հայտնում է ՀՀ քննչական կոմիտեն, դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մաս 7-րդ և 8-րդ կետերով (սպանություն մի խումբ անձանց կամ կազմակերպված խմբի կողմից, շահադիտական դրդումներով, պատվերով, ինչպես նաև զուգորդված՝ շորթմամբ, ավազակությամբ կամ բանդիտիզմով) և 235-րդ հոդվածի 1-ին մասով (Ապօրինի կերպով հրազեն, բացի ողորկափող հրազենից 7 դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։ -0-