ԵՐԵՎԱՆ, 26 հունվարի. /ԱՌԿԱ/. Եվրոպական Կենտրոնական բանկի ղեկավարությունը պատրաստ է 2016 թ.–ի սեպտեմբերից հետո ևս շարունակել քանակական մեղմման ծրագիրը, եթե դա պահանջեն գնաճային սպասումները, հայտարարել է ԵԿԲ–ի գործադիր խորհրդի անդամ Բենուա Կերեն, տեղեկացնում է Vestifinance.ru–ն։
«Եթե մենք չհասնենք մեր ուզածին, և ես կասեի, որ պետք է հասնենք` ԵԿԲ–ի մանդատին համապատասխան, այսինքն` պետք է հստակ վստահ լինենք, որ գնաճը միջնաժամկետ հեռանկարում կվերադառնա 2 տոկոսին մոտ մակարդակին, ապա մենք ստիպված կլինենք ավելի շատ միջոցներ ձեռնարկել կամ երկարացնել ակտիվների գնումը», – հայտարարել է Կերեն Bloomberg գործակալությանը տված հարցազրույցում։
Նա նշել է, որ քանակական մեղմման ծրագիրը չունի ժամանակային սահմանափակում։
«Նախատեսվում է, որ այն կգործի մինչև 2016 թ.–ի սեպտեմբեր, իսկ հետո մենք կիրականացնենք վերագնաահտում և կորոշենք` արդյո՞ք բավարար է արվել, թե ոչ», – նշել է Կերեն։
ԱՄՆ–ի դոլարի նկատմամբ եվրոյի փոխարժեքը հինգշաբթի նվազել է 2,1 տոկոսով և ուրբաթ շարունակել է նվազել` գրանցելով 11 տարվա նվազագույն ցուցանիշը։
Կերեի խոսքերով` եվրոյի փոխարժեքի անկումը քանակական մեղմման «հետևանքներից մեկն է», սակայն դրա նպատակը չէ։
Հիշեցնենք, որ ԵԿԲ–ն որոշել էր պարտատոմսերի գնման մասշտաբային ծրագիր գործարկել։
QE ծրագիրը, որի մասին հայտարարել էր Դրագին, նախատեսում է մինչև 2016 թ.–ի սեպտեմբեր ամսական 60 մլրդ եվրոյի ակտիվների գնում։ Լիկվիդային դրամական միջոցների ընդհանուր ծավալը, որը մուտք կգործի եվրոպական տնտեսություն, կկազմի մոտ 1,08 տրիլիոն եվրո։–0–