ԵՐԵՎԱՆ, 15 հունիսի. /ԱՌԿԱ/. Զիմբաբվեի պահուստային բանկը (Reserve Bank of Zimbabwe), որը կատարում է երկրի կենտրոնական բանկի գործառույթները, տեղական դոլարի արժեզրկման պատճառով հունիսի 15–ին սկսել է արժույթը շրջանառությունից հանելու գործընթացը, հաղորդում է Փրայմը` հղում անելով Սինհուա գործակալությանը։
Այն անձինք, ովքեր իրենց բանկային հաշիվներում ունեն մինչև 175 կվադրիլիոն զիմբաբվեական դոլար, կարող են փոխանակել դրանք 5 ԱՄՆ դոլարով։ Այս սահմանաչափը գերազանցող գումարը կփոխանակվի` ելնելով 35 կվադրիլիոն տեղական դոլարը մեկ ԱՄՆ դոլարի դիմաց հաշվարկից։ Զիմբաբվեի կենտրոնական բանկը նախատեսում է գործընթացն ավարտել սեպտեմբերին։
2009թ.–ից Զիմբաբվեի ազգային արժույթը գրեթե դադարել է շրջանառվել հիպերգնաճի պատճառով։ Այն փոխարինվել է այլ արժույթով, մասնավորապես` ԱՄՆ դոլարով և հարավաֆրիկյան ռանդով։
«Մենք չենք կարող երկու օրինական արժութային համակարգ ունենալ։ Հետևաբար պետք է պաշտպանենք բազմարժութային համակարգի ամբողջականությունը», – Bloomberg գործակալությունը մեջբերում է Զիմբաբվեի ԿԲ–ի ղեկավար Ջոն Մանգուդյայի (John Mangudya) խոսքը։
Զիմբաբվեի կենտրոնական բանկը 2008թ.–ին հայտարարել էր 100 միլիոն, 50 միլիոն և 10 միլիոն զիմբաբվեական դոլար անվանական արժեքով նոր թղթադրամների թողարկման մասին։ Պատճառը աստղաբաշխական գնաճն էր, որը տարեկան կտրվածքով 231 մլն տոկոս էր կազմել։–0–