ԵՐԵՎԱՆ, 4 մայիսի. /ԱՌԿԱ/. Anonymous միջազգային հակերական խումբն արշավ է հայտարարել աշխարհի Կենտրոնական բանկերի համակարգչային համակարգերի դեմ, գրում է ՌԻԱ Նովոստին։
Հակերները պնդում են, որ ֆինանսական հաստատությունների դեմ իրենց գործողությունները սկսվել են Հունաստանի ԿԲ–ի կայքի վրա` երեքշաբթի իրականացված գրոհով։
«Մենք անդադար գրոհել ենք հունական ԿԲ–ի կայքը։ Այս գործողությունը նշանավորում է աշխարհի ԿԲ–ների կայքերի դեմ ուղղված մեր 30–օրյա արշավի մեկնարկը», – Ռոյթեր գործակալությունը մեջբերում է հակերների տեսաուղերձը։
Հունաստանի ԿԲ–ի ներկայացուցիչը հաստատել է, որ ԿԲ–ի կայքը ենթարկվել է հակերների գրոհի։ Նրա խոսքով` գրոհը տևել է մի քանի րոպե և ճնշվել է ԿԲ–ի համակարգչային պաշտպանության միջոցների կողմից` առանց որևէ հետևանքի։ Պարզապես խափանվել է կայքի աշխատանքը։ –0–