ԵՐԵՎԱՆ, 22 նոյեմբերի. /ԱՌԿԱ/. Հայկական ազգային արժույթը` դրամը, արժանի է վստահության, կարծում է «Նորավանք» գիտակրթական հիմնադրամի տնօրեն Գագիկ Հարությունյանը։
«Կարծում եմ` դրամին կարելի է վստահել, այն կայուն արժույթ է։ Ժամանակին դրամի ընդունումը ճիշտ որոշում էր, և հիմա ես դժվարությամբ եմ պատկերացնում Հայաստանն առանց դրամի», – ասաց Հարությունյանը` պատասխանելով «ԱՌԿԱ» գործակալության կազմակերպած հարցմանը` հայկական ազգային արժույթի շրջանառության մեջ դնելու 20–ամյակի կապակցությամբ։
Միաժամանակ փորձագետը կարծիք է հայտնել, որ տնտեսական տեսակետից ազգային արժույթի փոխանակումը ցանկացած այլ արժույթով անիմաստ է` անգամ հաշվի առնելով եվրասիական ինտեգրման խորացումը։
«Դա տեղի չի ունենա անգամ հեռավոր ապագայում», – եզրափակեց Հարությունյանը։
1993 թ.–ի նոյեմբերի 22–ին ԽՍՀՄ պետական բանկի ռուբլու փոխարեն Հայաստանի տարածքում շրջանառության մեջ դրվեցին դրամային թղթադրամներ, ինչը թույլ տվեց երկրում հնարավորություն ստեղծել` ֆինանսական և բանկային համակարգի կայացման, ինչպես նաև տնտեսության զարգացման համար։ Այսօր հայկական դրամը նշում է իր 20–ամյակը, այն իրավամբ պետության անկախության հիմնական խորհրդանիշերից է, առանց որի երկիրը չի կարող սեփական դրամավարկային և ֆինանսական քաղաքականությունն իրականացնել ու զարգացնել տնտեսությունը։–0–