ԵՐԵՎԱՆ, 6 փետրվարի. /ԱՌԿԱ/. 2017 թ.–ին Հայաստանի պետական պարտքը կկազմի 6 մլրդ 250 մլն դոլար, լրագրողներին է հայտարարել ՀՀ ֆինանսների նախարար Վարդան Արամյանը:
Նրա խոսքով, այս թվի մեջ ներառված է նաև Կենտրոնական բանկի պարտքը, որի չափը կկազմի մոտ 530 մլն դոլար։
Նախարարը նշեց, որ 2016 թ.–ի վերջին Հայաստանի պետական պարտքը կազմել է մոտ 5,9 մլրդ դոլար։
«Հայաստանի ներքին և արտաքին պարտքը հասել է շուրջ 5,4 մլրդ դոլարի, ինչը կազմում է ՀՆԱ–ի 54 տոկոսը, ԿԲ–ի պարտքը կազմել է շուրջ 503 մլն դոլար», – հայտարարեց Արամյանը։
Նրա խոսքով, 2016 թ.–ի արդյունքում Հայաստանը ներառված է պարտքային բեռի ցածր մակարդակ ունեցող երկրների շարքում։
«Պետական պարտքի ոլորտում էական խնդիրներ չենք տեսնում, բոլոր հարաբերական ցուցանիշներով Հայաստանը գտնվում է պարտքային բեռի ցածր մակարդակ ունեցող երկրների թվում, և առաջիկա տարիների կանխատեսմամբ պետական պարտքի հետ կապված խնդիրներ չենք ունենա», – ավելացրեց Արամյանը։–0–