ԵՐԵՎԱՆ, 24 դեկտեմբերի. /ԱՌԿԱ/. Արտակարգ դեպք է տեղի ունեցել «Մելլաթ» բանկում։
Ինչպես հայտնում է ոստիկանության մամուլի ծառայությունը, դեկտեմբերի 24-ին, ժամը 10.15-ի սահմաններում, Երևանի Թումանյան փողոցում գտնվող «Մելլաթ» բանկ է մուտք գործել մի երիտասարդ, պարսկերենով ինչ-որ պահանջներ ներկայացրել, դանակով ու էլեկտրաշոկերով ահաբեկել է, այնուհետև սկսել էլեկտրաշոկերը կիրառել:
Բանկում ծառայություն իրականացնող ոստիկանության ՊՊԳՎ ծառայողներն արագ արձագանքելով, վնասազերծել են նրան և փոխանցել ոստիկանության Կենտրոնականի բաժին:
Ոստիկանության Կենտրոնականի բաժնի ծառայողների ձեռնարկած միջոցառումների արդյունքում պարզվել է, որ բերման ենթարկվածը ԻԻՀ քաղաքացի, 1982 թ. ծնված Մորտեզա Գհորբան Ջոշոառն է, ով էլեկտրաշոկերի սպառնալիքով բանկի աշխատակիցներից գումար է պահանջել:
Փաստի առթիվ հարուցվել է քրեական գործ:
Մորտեզա Գհորբան Ջոշոառը ձերբակալված է:
«Պարզվել է նաև, որ դեկտեմբերի 21-ին, ժամը 21.15-ին, Մորտեզա Գհորբան Ջոշոառը Տիգրան Մեծի պողոտայում գտնվող դեղատուն որպես հաճախորդ էլեկտրահարող սարքով այցելել և գումար է պահանջել դեղատան աշխատակցից, սակայն իր կամքից անկախ հանգամանքներում հանցագործությունն ավարտին չի հասցրել»,– ասվում է հաղորդագրության մեջ։
Քննությունը շարունակվում է: -0-