ԵՐԵՎԱՆ, 18 հուլիսի. /ԱՌԿԱ/. Fitch միջազգային վարկանիշային գործակալությունը նվազեցրել է խոշորագույն ֆրանսիական բանկերի երկարաժամկետ վարկանիշները։ Ինչպես ասվում է Fitch–ի պաշտոնական հաղորդագրության մեջ, նվազումն անդրադարձել է Credit Agricole, Societe Generale, Groupe BPCE, Dexia և Dexia Credit Local բանկերին։ Դրանց վարկանիշները նվազեցվել են մեկ աստիճանով` «А+»–ից դարձնելով «А», գրում է РБК–ն։
Նաև մեկ աստիճանով նվազեցվել են այդ բանկերի կարճաժամկետ վարկանիշները` «F1+»–ից մինչև «F1»։ «АА-»–ից մինչև «А+» է նվազեցվել La Banque Postale–ի երկարաժամկետ վարկանիշը (կարճաժամկետ վարկանիշը հաստատվել է «F1» մակարդակում)։
Բոլոր բանկերի կայունության վարկանիշները մնում են նախկին մակարդակում։ Բոլոր վարկանիշների կանխատեսումը կայուն է։
Առաջատար բանկերի վարկանիշների նվազումը կապված է 2013թ.–ի հուլիսի 13–ին տեղի ունեցած մեկ աստիճանով Ֆրանսիայի երկարաժամկետ վարկային վարկանիշի նվազումով` «AAA»–ից մինչև «AA+»։ Ըստ Fitch–ի` ներկա պահին Ֆրանսիայի կառավարությունն ավելի քիչ հնարավորություններ ունի երկրի բանկային համակարգին աջակցելու համար, քան առաջ, ինչն էլ վարկանիշների նվազում է առաջացրել։ Գործակալության փորձագետները նշում են, որ տվյալ բանկերի ֆինանսական խնդիրները (առաջացման դեպքում) կարող են «եվրոպական բանկային ոլորտի ծայրահեղ անկայուն դրության» վատացման հանգեցնել։ –0–